Уругвайнинг асосий футболчилари Ўзбекистонга қарши баҳсни ўтказиб юбориши мумкин

Хабарингиз бор, яқинлашиб келаётган ФИФА кунларида Ўзбекистон миллий терма жамоаси икки карра жаҳон чемпионлари Уругвай терма жамоасига ўртоқлик учрашувида иштирок этади. Учрашув 13 октябрь куни Малайзияда ўтказилиши режалаштирилган. Уругвай терма жамоасининг икки нафар асосий футболчиси - ҳужумчи Дарвин Нуньес ва ҳимоячи Хосе Мария Хименес, Ўзбекистонга қарши баҳсни ўтказиб юбориши мумкин. Ёзда "Ал Ҳилол" сафига кўчиб ўтган ҳужумчи ўтган ҳафта машғулотлардан бирида тиззасидан жароҳат олган ва айни дамда жароҳатдан тикланиш жараёнида. Шу сабабли, Нуньес Элит ОЧЛ доирасидаги "Насаф"га қарши учрашув қайдномасидан ўрин олмади ва Қаршига келмади. Риёд клуби бош мураббийи Симоне Инзаги матбуот анжуманларидан бирида Нуньес ФИФА кунлари давомида жароҳатидан тўлиқ тикланиб олиши ҳақида айтиб ўтди.

"Атлетико" ҳимоячиси Хосе Мария Хименес эса КЖЧда олган жароҳатидан тикланмоқда. Уругвайлик ҳимоячи сўнгги бор, 20-июнь санасида КЖЧ доирасида ўтказилган "Атлетико" - "Сиэтл Саундерс" ўйинида майдонда ҳаракатланган эди. Mundo Deportivo маълум қилишича, Хименес жамоавий машғулотларга қайтиб улгурган, аммо шанба куни ўтказилган "Реал"га қарши ўйин қайдномасидан ўрин олмаган эди. Шунингдек, уругвайлик журналист Хавьер Де Леон маълум қилишича Хименес Уругвай терма жамоасининг октябрь ойидаги йиғинларига чақирилиш эҳтимоли кам.