US Open. Ига Свёнтекнинг юриши бошланди, бу унинг мавсумдаги 50-ғалабаси!

Польшалик теннис маликаси биринчи даврада WTA рейтингида 84-ўринни эгаллаб турган колумбиялик Эмилиана Арангони ортиқча қийинчиликсиз таслим этди - 6/1, 6/2. Бу теннисчиларнинг ўзаро ўтказган иккинчи учрашуви бўлди - 2:0.  

Олтмиш бир дақиқа давом этган баҳсда иккала тенничи ҳам биттадан эйс зарбасини амалга оширган. Қўшхатолар Игада кўпроқ бўлди - 3 га 2. Свёнтек брейклар бўйича мутлақ устунликка эга бўлди - 4 га 0. 

Шу тариқа, Ига Свёнтек мавсумдаги 50-ғалабасини қўлга киритди. Польшалик теннисчи 65 та WTA турнирларининг стартида ютқазмай келяпти. Бу Очиқ эрадаги рекорд натижа ҳисобланади. Энди у АҚШ Очиқ чемпионатининг иккинчи босқичида Сюзан Ламенсга қарши кортга чиқади. Ўз ўрнида нидерландиялик бу теннисчи биринчи даврада америкалик Валери Глозманндан устун келди - 6/4, 6/2.