Усик - Бриедис: Боксчилар оладиган гонорар суммаси маълум

Бўлажак жангда WBO йўналиши чемпиони украиналик Александр Усик (13-0-0, 11 КО) WBC чемпионлик камари соҳиби латвиялик Майрис Бриедисга (24-0-0, 18 КО) қарши рингга кўтарилади.

Ушбу жанг 27 январь куни Латвия пойтахти Рига шаҳрида бўлиб ўтади. Суперсериянинг иккинчи ярим финал жанги эса 3 февраль куни Сочи шаҳрида россиялик Марат Гассиев ҳамда германиялик Юниер Дортикос ўртасида ўтказилади.

Маълумотларга кўра, Усик - Бриедис ҳамда Дортикос - Гассиев жангидаги тўрт боксчининг бари 800 000 доллардан гонорар олишади. Жуфтликларда ғолиб бўлган боксчиларга яна 800 000 доллар мукофот пули берилади.  

Эътиборлиси, финал жанги қатнашчилари ўз ҳамёнларини 2 миллион долларга бойитиб олишади. Якунда чемпион бўлган чарм қўлқоп устасига яна қўшимча 2 миллион доллар тақдим этилади. Чемпион умумий 5 миллион 600 минг долларга эга чиқади.

Эслатиб ўтамиз, ушбу жангларга чипталар 11 декабрь кунидан сотувга чиқарилган эди. Чипталарни 50 еврога харид қилиш мумкин.