UzChess Cup. Абдусатторов асосий рақиби билан ўйнади, Синдаровда кутилмаган натижа, 4-турнинг барча натижалари битта хабарда

Иккинчи бор ташкил этилаётган UzChess Cup турнири Masters, Challengers ва Futures гуруҳларида ўтказилмоқда. Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, венгриялик Ричард Раппорт, ўзимизнинг гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов ўзаро баҳс олиб боряпти. 

FIDE Circiut учун қимматли рейтинг очколари ўйналаётган ушбу халқаро турнирнинг 4-турида Нодирбек Абдусатторов қора доналарда асосий рақибларидан бири, ҳиндистонлик гроссмейстер Аржун Эргаиси билан дуранг ўйнади. Жавоҳир Синдаров эса бироз кутилмаганда яна бир ҳинд шахматчиси Рамешбабу Праггнанандҳага ютқазиб қўйди. Нодирбек Якуббоев ҳам бу турда мағлубият аламини тотиб кўрди. У эронлик Парҳам Мақсудлуга имкониятни бой берди. Шамсиддин Воҳидов бу турда қора доналарда венгриялик Ричард Раппорт билан муросага келди. 

Турнирнинг Challengers гуруҳида иштирок этаётган Гулруҳбегим Тоҳиржонова қора доналарда хитойлик Ма Кун билан дурангга эришди. Муҳиддин Мадаминов пешқадамлик учун кечган баҳсда грециялик Николас Теодороуга ютқазди. Жаҳонгир Воҳидов украиналик шахмат афсонаси Василий Иванчукни мағлуб этишни уддалади. Ёш шахматчимиз Муҳаммадзоҳид Суяров Виталий Сивук билан очколарни бўлишиб олди. 

Futures гуруҳининг 4-турида Саидакбар Сайдалиев оқ доналарда Алан Пичотни таслим этди. Ҳумоюн Бегмуратов Клементи Сичёв билан дуранг қайд этди. Гроссмейстеримиз Ортиқ Ниғматов ғалабали сериясини давом эттирди. Бу сафар у Роберт Ракдан устун келди. Абдималик Абдисалимов Борис Чаталбашевга ютқазиб қўйди.