UzChess Cup. Абдусатторовда ғалаба, 3-турнинг барча натижалари битта хабарда + ФОТО

Иккинчи бор ташкил этилаётган UzChess Cup турнири Masters, Challengers ва Futures гуруҳларида ўтказилмоқда. Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, венгриялик Ричард Раппорт, ўзимизнинг гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов ўзаро баҳс олиб боряпти. 

FIDE Circiut учун қимматли рейтинг очколари ўйналаётган ушбу халқаро турнирнинг 3-турида Нодирбек Абдусатторов оқ доналарда Ричард Раппортни мағлубиятга учратди. Ўтган турда Абдусатторов билан дуранг ўйнаган Жавоҳир Синдаров бу сафар Шамсиддин Воҳидовга қарши кечган ўзбек дербисида муросага келди. Нодирбек Якуббоев Рамешбабу Праггнанандҳа билан дуранг қайд этди. Жаҳон чемпиони Ян Непомняший оқ доналарда Аржун Эргаиси билан очколарни бўлишиб олди. Парҳам Мақсудлу - Аравиндҳ Читамбарам партиясида ҳам дуранг кузатилди.  

Турнирнинг Challengers гуруҳида иштирок этаётган Гулруҳбегим Тоҳиржонова оқ доналарда украиналик шахмат афсонаси Василий Иванчукка ютқазиб қўйди. Жаҳонгир Воҳидов озарбайжонлик таниқли шахматчи Нижат Абасов билан дуранг ўйнади. Гроссмейстеримиз Муҳиддин Мадаминов хитойлик Ма Кунни таслим этишга муваффақ бўлди. Ёш шахматчимиз Муҳаммадзоҳид Суяров Ҳонг Эндрюга ютқазди. 

Futures гуруҳининг 3-турида ҳам ўзбек дербиси кузатилди. Саидакбар Сайдалиев қора доналарда ўйнаб, Ҳумоюн Бегмуратовга имкониятни бой берди. Гроссмейстеримиз Ортиқ Ниғматов қора доналарда ҳаракат қилганига қарамай, пешқадам туркманистонлик Сапармират Атабаевни мағлубиятга учратди. Абдималик Абдисалимов оқ доналарда Алан Пичотга ютқазиб қўйди.