07 авг 15:42
Янгиликлар

Бошқалар

V Ислом бирдамлиги ўйинлари: делегациямиз учун барча шароитлар яратилган

Кеча спортчилар, мураббийлар, ОАВ ходимлари ва мутасаддилардан ташкил топган Ўзбекистон спорт делегацияси V Ислом бирдамлиги ўйинларида иштирок этиш учун Туркиянинг Коня шаҳрига етиб боришганди.

Ташрифнинг илк кунидан ҳукумат вакиллари, Ўзбекистон Республикаси спортни ривожлантириш вазирлиги ва Миллий Олимпия қўмитаси мутасаддиларидан ташкил топган штаб ўз ишини бошлади.

Даставвал штаб томонидан йиғилиш ўтказилиб, унда спорт мусобақаларининг кун тартиби, спортчиларнинг саломатлиги ва шу каби масалалар муҳокама қилинди.

24 та спорт турида ўз маҳоратларини кўрсатиш учун ташриф буюрган 265 нафар спортчиларимиз айни кунларда мусобақаларга қизғин тайёргарлик кўришмоқда. Бу борада Коня шаҳрида улар учун яратилган шарт-шароитлар ҳам алоҳида аҳамиятга эга.

Хусусан, Ўзбекистон делегацияси аъзолари учун Олимпия шаҳарчасида ташкил этилган тиббиёт пунктларида ҳам барча зарур шароитлар яратилган. Қолаверса, ҳар бир спортчининг саломатлигини назорат қилиб туриш штаб фаолиятининг асосий вазифаларидан бири этиб белгиланди. Бунинг учун тиббиёт пунктлари зарур техник жиҳозлар ва дори-дармонлар билан тўлиқ таъминланган.

Қайд этиб ўтамиз, V Ислом бирдамлиги ўйинлари 9 августда расман очилади.