Ванкуверда ФИФАнинг 76-Конгресси ўтказилди

Унда ташкилотга аъзо мамлакатлар қаторида ЎФА биринчи вице-президенти Равшан Ирматов бошчилигидаги Ўзбекистон делегацияси ҳам иштирок этди. Конгрессда сўз олган ФИФА Президенти Жанни Инфантино бир қатор лойиҳалар, хусусан, FIFA Forward дастури орқали бутун дунё бўйлаб футбол жадал равишда ривожланиб бораётганини таъкидлади.

Унга кўра, ФИФАнинг 211 та аъзо ассоциацияси билан ҳамкорликда амалга оширилаётган мазкур лойиҳалар сони аввалги тсиккилларга нисбатан саккиз баравар ошган. Шунингдек, навбатдаги сиклда FIFA Forward дастури доирасидаги инвестициялар рекорд даражага етиши қайд этилди.

Бундан ташқари, ФИФА раҳбари футбол дунёда бирлик ва ҳамжиҳатлик воситаси эканлигини айтиб, жорий йилги ФИФА Жаҳон чемпионатида иштирок этадиган 48 та аъзо ассоциация жаҳон саҳнасида порлашга тайёр эканини билдириб, жамоаларга омад тилади.

Шунингдек, кун тартибидан ташкилотнинг 2025 йилги баённомаси ва йиллик ҳисоботини тасдиқлаш, тартиб-интизом қўмитаси аъзоларини сайлаш, ФИФА Низомида белгиланган муддатда аъзо ассоциациялар ва Кенгаш томонидан киритилган таклифларни муҳокама қилиш ҳамда ирқчиликка қарши глобал ташаббусни давом эттириш масалалари ўрин олди.