Вазият таранглашяпти. Хабиб ва Умар Мераб Двалишвилига кескин жавоб қайтаришди

Грузиялик аралаш яккакураш устаси Абу-Дабида мухлислардан бирининг Умар билан жанг қилишдан нега қочаяпсан деган гапига кескин жавоб қайтарганди. 

"Нега у овоз пардасини баландлатиб гапиряпти? Ҳеч ким унга бақириб гапиргани йўқ-ку. Ҳақиқат бақир-чақир эмас, аниқ фактлар билан исботланади", - деди кичик Нурмагомедов ўзининг ижтимоий тармоқдаги саҳифасида. 

Бу ҳолат енгил вазнда собиқ UFC чемпиони Хабиб Нурмагомедовни ҳам бефарқ қолдирмади. Хабиб Умарнинг амакиваччаси бўлиш баробарида унинг мураббийи ҳам ҳисобланади. 

"Умар шунчаки рақобатни истаяпти. Ислам ва мен унинг ҳолатига тушиб улгурганмиз. Унинг ҳозирги ҳолати ўтиш даври деб аталади. Вақт ўтгани сайин ҳамма сен билан жанг қилишни истаб қолади. Шунчаки, юришда давом этиш керак", - дея босиқлик билан вазиятга муносабат билдирди Хабиб. 

Бир муддат аввал UFC раҳбари Дана Уайт Мераб Двалишвили илк чемпионлик ҳимоя жангини Умар Нурмагомедовга қарши ўтказиши кераклигини айтганди. Мерабнинг ўзи Шон О’Мэллига реванш беришни хоҳламоқда.