Вилоятлардаги спорт федерациялар фаолияти қайта кўриб чиқилади

Учрашувда шунингдек, Миллий олимпия қўмитаси Бош котиби Жасур Матчанов, Жисмоний тарбия ва спорт вазирлиги бошқарма бошлиғи Назиржон Худойқуловлар ҳам иштирок этишди. 

"Қилаётган ишларимизни бир тизимга солиб олмагунимизча, бундай йиғилишлар ҳали кўп ташкил этилади. Жисмоний тарбия ва спорт вазирлиги билан ҳамкорликда катта ишларни бошлаганмиз. Ўз олдимизга катта режалар қўйганмиз. Олдимиздаги асосий вазифалардан бири вилоятларимиздаги спорт федерациялари бўлимлари ишини тартибга солиб олишдир", - деди МОҚ Бош котиби.

Йиғилишда Осиё ўйинларига ишлаб чиқилган стратегия ҳусусида федерация мутасаддиларига тушунтириш берилди. Унга кўра, яккакураш спорт турларида МОҚ соврини учун ўтказилаётган мусобақаларда юқори ўринларни эгаллаган тўрт нафар спортчи билан алоҳида ишланади. Уларнинг бири терма жамоанинг асосий аъзоси, қолганлар эса унга захира вазифасини бажаради. Улар қатъий тартиб асосида ўқув-машғулотлар базасида Жакартадаги Осиё ўйинларига тайёргарлик кўрадилар. 

Мутахассислар билан бирга уларнинг тайёргарлик режаси ишлаб чиқилади. Ўша спортчиларнинг уйқудан уйғонишдан тортиб машғулотларигача, овқатланишдан тортиб дам олиш вақтигача қатъий белгилаб берилади. Осиё ўйинларигача шундай тартибда ишланади. Кейин эса Олимпия ўйинлари учун янги стратегия ишланади. 

МОҚ Бош котиби яккакураш спорт турларида вилоят терма жамоалари ўртасида МОҚ соврини учун махсус мусобақа ташкил қилиниши ҳақида ҳам айтиб ўтди. 

"Яккакураш спорт турлари бўйича ҳар бир вилоятнинг ўз терма жамоаси шакллантирилади. Улар ўртасида Миллий олимпия қўмитаси соврини учун катта мусобақа бўлиб ўтади. У ҳақиқий шоу кўринишида бўлади. Биринчи ўринни қўлга киритган жамоа яхшигина мукофотланади. Бунгача фақат биринчи ва иккинчи рақамли спортчиларга эътибор қаратилган. Учинчи ва тўртинчи рақамли спортчилар эътибордан четда қолиб кетган. Биз уларга ҳам имконият бермоқчимиз. Тажриба шуни кўрсатмоқдаки, тўртинчи рақамли спортчи терма жамоанинг биринчи рақамли аъзосини ҳам ютиб қўйиши мумкин. Шу сабабдан ҳам улар ўртасидаги рақобатни йўлга қўямиз", - деди Матчанов.