Владимир Шин ўзбек ва япон боксидаги фарқ ҳақида гапирди

"Ўзбекистон боксидаги эрталабки жисмоний чиниқишдан тортиб, ўқув-машғулотлар, мусобақага тайёргарлик жиҳатлари билан Япониядаги айни ҳолат ўртасида жуда катта фарқ бор. Мамлакатимизда боксга давлат даражасида эътибор қаратилади. Мусобақаларга комплекс тайёргарлик дастурлари, “Йўл харита”лари ишлаб чиқилади. 

Ҳар бир боксчига бериладиган техник-тактик юкламалардан ташқари, уларнинг жисмоний, руҳий мувозанатини мустаҳакамлашга ҳам алоҳида эътибор қаратилади. Японларда эса озгина бошқачароқ. Уларда кўпроқ профессионал бокс машғулотлари устунлик қилади. Токио олимпиадасига тайёргарлик жараёнида уларнинг тайёргарлик дастурларига айни ҳолатларни жорий этишга ҳаракат қилдик. Олимпиада ва жаҳон чемпионатидаги муваффақиятимиз(Япония)нинг туб негизида боксчиларга юкламаларда ўзгариш қилиш натижасида эришдик, деб ўйлайман. 

Шу маънода, кейинги пайтдаги япон боксчиларининг машғулоти ўзбек боксчиларининг шуғулланиш жараёнига бироз ўхшаб кетди, десам муболаға бўлмайди. Японияда бокс Ўзбекистондагидек жуда оммавий спорт тури ҳисобланмайди. Тўғри, улар ҳам боксни яхши кўради. Қизиқади. Аммо оммавий шуғулланиш, алоҳида, махсус ҳаваскор бокс мактаблари йўқ уларда. Бокс билан асосан, ўқув юртлари спорт мажмуаларида, тўгаракларда шуғулланишади", - деди Владимир Шин UzA нашрига берган интервьюсида.