Волейбол: Бугун Ўзбекистон Суперкубоги соҳиби аниқланиши мумкин

Унда жорий йилги мамлакат чемпионлари ҳамда кубоги соҳиблари ўзаро куч синашмоқда.

Аёллар ўртасида Ўзбекистон чемпиони бўлмиш Қорақалпоғистон Республикаси терма жамоаси дастлабки ўйинда мамлакат кубоги финалчиси Жиззах вилояти термаси устидан ишончли ғалабага эришди – 3:0.

Эркаклар ўртасида чемпионатнинг олтин медалларини қўлга киритган ОТМК жамоаси волейболчилари эса мамлакат кубоги соҳиби Самарқанднинг «Ўзтелеком» жамоасига ҳеч қандай имконият қолдирмади – 3:1.

Бугун Суперкубок баҳсларининг иккинчи ўйинлари ўтказилади. Агар аёллар ўртасида қорақалпоғистонликлар ғалаба қозонишса, эркаклар ўртасида эса ОТМК волейболчиларининг қўли баланд келса, у ҳолда шанба кунги ўйинларга эҳтиёж қолмайди ва мусобақага якун ясалади.

Шунингдек, бугун волейбол ихлосмандлари учун «Очиқ эшиклар куни» ҳам ўтказилади.