ВХЛ. Бугун "Ҳумо" ўйнайди

Бу сафар хоккейчиларимизга Твернинг "Динамо" жамоаси рақиблик қилади. Қайд этиш лозимки, ушбу ўйин "Ҳумо" учун Олий хоккей лигаси чемпионати доирасида ушбу мавсумдаги сўнгги уй учрашуви бўлади. Кейинги учта ўйинни жамоамиз сафарда ўтказади. Ушбу ўйинлар якунига етгач, "Ҳумо" плей-офф босқичида ўйинлар ўтказиши мумкин бўлади. 

Бугун "Динамо"га қарши баҳс соат 19:30да бошланади. Унгача эса "Ҳумо Арена"да кўнгилочар дастурлар намойиш этилади. Ушбу тадбирлар соат 19:00да бошланиши кўзда тутилган. Ўйин давомида мухлислар ўзлари билан юмшоқ ўйинчоқлар олиб келишлари ва белгиланган вақтда уни музга улоқтиришлари мумкин бўлади. Ўйинчоқлар ва бугунги ўйин чипталари сотувидан тушган маблағ айни пайтда азият чекаётган ҳаста болакайларга туҳфа этилади. Демак хайрли ишга ўз ҳиссангизни қўшинг ва "Ҳумо Арена"га ташриф буюринг.