WBA 15-раундлик жангларга қайтишни режалаштирмоқда

Ташкилот президенти Хильберто Мендосанинг айтишича, бошланишига айрим муҳим жангларда бу нарса синаб кўрилади. Якуний қарор эса бу жангларнинг якунига қараб эълон қилинади. 

Аввалроқ, биринчи яримўрта вазн тоифасида WBO чемпиони Теофимо Лопес 15 раундлик жангларни қайтариш бокс жозибасини янада ошириши мумкинлиги ҳақида айтган эди. Унинг фикрича, мутлақ жаҳон чемпионлик жанглари ҳозиргидек 12 раунд эмас, 15 раунддан иборат бўлиши керак. 

"Келинглар, яна учта раунд қўшамиз ва биз ҳақиқий чемпион кимлигини биламиз", — деди  Лопес The Ring журнали подкасти эфирида.

Бу режанинг амалга ошиши осон бўлмайди. Бунинг учун фақат WBA эмас, қолган яна учта асосий ташкилот ҳам бу ғояни қўллаб-қувватлаши керак. 

Эслатиб ўтамиз, 15 раундлик жанглар охирги мартта 1982 йилда ўтказилган. Унгача барча чемпионлик жанглари 15 раундлик форматда ташкил этилган. 1982 йилда WBC қарорига кўра, 15 раундлик форматдан воз кечилиб, 12 раундга ўтилган. Бунга кореялик боксчи Дук Ку Кимнинг ўлими сабаб бўлганди. Дук енгил вазнда WBA камари учун Рэй Манчинига қарши кечган жангнинг 14-раундида кома ҳолатига тушиб қолган ва бир неча кундан кейин шифохонада вафот этганди.