WBC Девин Хейнининг камарига расмий даъвогар тайинлади

Бу хабарни шахсан WBC президенти Маурисио Сулейман тасдиқлади. Мағлубият нималигини билмай келаётган америкалик чемпион навбатдаги ҳимоя жангини Сандор Мартинга қарши ўтказади. 

"Мен Девин билан фахрланаман. У ажойиб боксчи. У биринчи ярим ўрта вазнга ўтди ва чиройли ғалабага эришди. Прогрейсни нокдаун ҳолатига тушириб қўя олди. Бу йигит ҳазиллашмаяпти. Сандор Мартин расмий ва мажбурий даъвогар. У кутишга розилик берди. Навбат унга етиб келди. Биз тез орада ушбу жангни ташкил қилиш ишларини бошлаймиз", — деди Сулейман.

Маълумот учун, испаниялик 30 ёшли Сандор Мартин 2011 йилдан бери профессионал боксда фаолият олиб бормоқда. Америкалик Майки Гарсияни мағлубиятга учратганидан кейин дунё бокс оммаси эътиборига тушди. 2022 йилнинг декабрида Теофимо Лопесга қарши жангда муносиб қаршилик кўрсатди. Ҳакамларнинг айри қарори билан ютқазган бўлса-да, ўзидан ўша оқшом яхши таассурот қолдирганди.