WR Chess Masters. Абдусатторовнинг 1/4 финалдаги тақдири яна тай-брекда ҳал бўлди

Мукофот жамғармаси 58 000 еврони ташкил қилувчи WR Chess Masters турнирида дунёнинг кучли 16 нафар гроссмейстери бош соврин учун баҳсларга киришганди. Улар орасида ёш гроссмейстерларимиз Нодирбек Абдусатторов ва Жавоҳир Синдаровнинг ҳам борлиги ҳақида хабар берган эдик.

Синдаров илк даврада франциялик Максим Вашье-Лагравга имкониятни бой бериб қўйган бўлса, Абдусатторов турнирдаги ягона аёл шахматчи, Швейцария шарафини ҳимоя қилаётган 12-Жаҳон чемпиони Александра Костенюкни тай-брекда, аниқроғи қўшимча армагеддон партиясида таслим этди. 

Афсуски, Нодирбек 1/4 финалда Жавоҳир учун реванш ола билмади. У Максим Вашье-Лагравга айнан армагеддон партиясида ютқазиб қўйди. Шахматчилар ўртасидаги дастлабки икки партияда томонлар дурангга имзо чекишганди. 

Шу тариқа, Жавоҳир Синдаровдан кейин Нодирбек Абдусатторов ҳам мусобақадаги иштирокини якунлади. Жавоҳир WR Chess Masters турниридаги иштирокидаги 1000, Нодирбек эса 2500 евро пул мукофоти ишлаб олди.