WTA Finals. Пегула юз фоизлик натижа билан 1/2 финалга чиқди

Дунёнинг бешинчи ракеткаси Жессика Пегула гуруҳ босқичининг уччала учрашувида ҳам ғалаба қозонди. Америкалик теннис маликаси квартетнинг сўнгги ўйинида WTA рейтингида 9-поғонада бораётган грециялик Мария Саккаридан ортиқча қийинчиликсиз устун келди - 6/3, 6/2. Мария уччала учрашувда ҳам мағлубият аламини тотиб кўрди.

Пегула бугунги ғалабаси эвазига теннисчиларнинг ўзаро учрашувларидаги ҳисоб мувозанатини тиклашга ҳам муваффақ бўлди - 5:5. Саксон дақиқа давом этган баҳсда иккала теннисчи ҳам эйс зарбасини амалга ошира олмади. Саккарига 8 та қўшхато ҳам қимматга тушди. Пегула эса аксинча, биронта ҳам хатога йўл қўймади. Брейклар 7 га 3 кўринишида Жессика фойдасига бўлди.