WTA Finals. Қозоғистонлик теннис маликаси муддатидан аввал 1/2 финалда

Жаҳон рейтингида Топ-8`таликда бораётган теннис маликалари икки гуруҳда бош соврин учун баҳсларга киришишганди. Серена Уильямс номли гуруҳда Елена Рибакина кетма-кет иккита учрашувда ғалаба қозонди. WTA рейтингида 6-ўринни эгаллаб турган қозоғистонлик теннисчи дунёнинг иккинчи ракеткаси, польшалик Ига Свёнтекни уч сет натижасига кўра мағлубиятга учратди - 3/6, 6/1, 6/0.

Елена биринчи сетда ютқазганига қарамай, номдор рақибасини кейинги икки сетда шунчаки сочиб ташлади. У иккита сетда Игага бор йўғи битта геймни ютиб олиш имконини берди, холос. Теннисчиларнинг ўзаро учрашувларида ҳамон Свёнтек олдинда бормоқда - 8:6. 

Тўқсон тўққиз дақиқа давом этган баҳсда Свёнтек 2, Рибакина 5 та эйс зарбасини амалга оширди. Иккала теннис маликаси ҳам 3 тадан қўшхатога йўл қўйди. Брейклар бўйича устунлик табиийки, ғолиба томонда бўлди - 5 га 1. Елена Рибакина икки ғалаба эвазига муддатидан аввал 1/2 финал йўлланмасини қўлга киритди.