Хабиб Макгрегор билан жанг ҳақида: "Бу менинг таътилим эди"

"Дунёда бир ажойиб нарса бор - кимнидир ёқтирмасанг, "қафас"га кирасан, уни дўппослайсан ва бунинг учун сенга ҳақ тўлашади. Қафасдан ташқарида ҳам шундай қилсанг, сени қамаб қўйишади. Мен бу лаҳзани жуда узоқ кутган эдим. Мен у билан нафақат уришардим, балки йўл-йўлакай гаплаша олардим ҳам. Бу фурсатдан фойдаланиб, роҳатланиб олардим. Бу менинг таътилим эди", - деди Нурмагомедов "S Khalil" каналига берган интервьюсида.

Нурмагомедов жангнинг тўртинчи раундида Макгрегорни сабмишен эвазига бўғиб қўйганди. Ушбу тўқнашув икки ярим миллионга яқин пуллик трансляциялар сотилган аралаш яккакурашлар тарихидаги энг даромадли жанг бўлганди.

Хабиб Нурмагомедов ирландиялик билан жангдан сўнг енгил вазн тоифасидаги UFC чемпионлик камарини яна икки бор ҳимоя қилди. У Дастин Порье ва Жастин Гэтжини муддатидан олдин мағлуб этди ва шундан сўнг профессионал фаолиятини якунлаганини эълон қилган эди.