Хаддад Майя кичик WTA Якуний турнири ғолибаси!

Бразилиялик теннисчи Хитойнинг Чжухай шаҳри мезбонлик қилган мусобақанинг ҳал қилувчи финал учрашувида WTA рейтингида ўзидан бир поғона юқорида бораётган мезбонлар вакиласи Чжэн Циньвэнни тай-брекларда мағлубиятга учратди - 7/6(11), 7/6(4). 

Бу теннисчиларнинг ўзаро илк учрашуви эди. Икки соату 52 дақиқа давом этган баҳсда Хаддад Майя 2, Чжэн Циньвэнь 9 та эйс зарбасини амалга оширган. Қўшхатолар Чин юрти вакиласида кўпроқ бўлди - 6 га 2. Иккала теннисчи ҳам 3 тадан брейкка эришган.

Беатрис фаолиятидаги учинчи совринни қўлга киритди. Хард қопламали кортда у илк бор бош совринга эга чиқди. Чжухайдаги муваффақиятли иштирок унга 605,000 доллар мукофот пули ҳамда 700 рейтинг очкоси тақдим этди. Бугун эълон қилинган WTA рейтингида у дунёнинг 11-ракеткасига айланиб олди.