Халқаро "Олимпия куни”нинг 127 йиллиги муборак!

Бундан роппа-роса 127 йил аввал барон Пьер де Кубертен бошчилигида Олимпиадани тиклаш учун энг катта қадам қўйилди, яъни 1894 йилнинг 23 июнь куни Халқаро Олимпия қўмитаси (ХОҚ)га асос солинди. Ўшандан бери то шу кунгача ушбу сана Халқаро "Олимпия куни" сифатида нишонлаб келинади.

Бугунги кунга келиб “Олимпия куни” дунёда энг оммавий тарзда нишонланадиган спорт байрамларидан бирига айланган. Ҳар йили Халқаро Oлимпия қўмитасига аъзо 205 давлатда ўтказиладиган спорт ва саломатлик байрамида миллионлаб инсонлар бевосита иштирок этишмоқда. Ушбу тадбирни ўтказишдан кўзланган асосий мақсад – аҳоли орасида соғлом турмуш тарзи ҳамда Олимпизм ғояларини кенг тарғиб этиш, катта-ю, кичик қалбида жисмоний тарбия ва спортга бўлган меҳрни янада юксалтиришдан иборат.

Мамлакатимизда аҳоли ўртасида спортни оммалаштириш, соғлом турмуш тарзини тарғиб қилиш, жаҳон ареналарида спортчиларимизнинг муносиб иштирок этиб, юқори марраларни забт этиши учун шу кунга қадар Президентимизнинг жисмоний тарбия ва спортни ривожлантиришга оид ўндан ортиқ фармон ва қарори, улар асосида Вазирлар Маҳкамасининг кўплаб қарорлари қабул қилинмоқда.

Кечадан эътиборан ушбу санага бағишлаб бир қатор федерацияларимиз томонидан турли байрам тадбирдари ташкил этилмоқда. Бу эса мусобақаларга чанқоқ бўлиб турган атлетларимизнинг руҳиятини оширишга, улар орасидаги ҳалол рақобатни, соғлом турмуш тарзини янада ривожлантиришга туртки бўлмоқда.

Фурсатдан фойдаланиб, спорт ва соғлом турмуш тарзига бефарқ бўлмаган барча юртдошларимизни Халқаро “Олимпия куни”нинг 127 йиллиги билан табриклаймиз. Спорт ҳамиша ҳаётингизнинг ажралмас бўлаги бўлиб қолсин!