Хамзат Чимаев бу йил бошқа жанг ўтказмайди

Бу ҳақда журналист ва инсайдер KevinK ўзининг Х (Twitter) ижтимоий тармоғи орқали хабар берди. БАА шарафини ҳимоя қилаётган чеченистонлик аралаш яккакураш устаси 18 август куни тонгда ўтказилган UFC 319 турнирининг асосий жангида эндиликда собиқ UFC чемпиони Дрикус дю Плессини мағлубиятга учратганди.

Чимаев ўша жангдан кейин ўтказилгани матбуот анжуманида агар промоушен раҳбарлари хоҳласа, 25 октябрь куни ташкил этиладиган Абу-Дабидаги UFC 321 турнирида октагонга чиқишга ва илк чемпионлик ҳимоя жангини ўтказишга тайёр эканини айтганди. 

Хамзатга қарши жанг қилишга тайёрлигини билдирган нидерладиялик Ренье де Риддернинг 18 октябрь куни Канададаги турнирнинг марказий жангида америкалик Энтони Эрнандесга қарши октагонга чиқишини инобатга олсак, чемпионнинг қайтишини бу йил кутмасак ҳам бўлади. Чимаев ҳам кеча Риддернинг бу чорловини қабул қилган ва у билан айнан Абу-Дабида жанг қилишга рози эканини айтганди.