Хамзат Чимаев UFC`даги режалари ҳақида гапирди: жанг ёки операция

БАА шарафини ҳимоя қилаётган чечен жорий йил охиригача октагонга қайтишни режалаштирмоқда. Бироқ, агар ташкилот матчмейкерлари унга рақиб топа олишмаса, у жароҳатларини даволатиш учун танаффус олади.

"Вазият бироз ғалати. Менга қўнғироқ қилишмаяпти, ҳеч нарса дейишмаяпти. Мен уларга Абу-Дабида жанг қилмоқчи эканлигимни айтдим – камар учун сўрамадим, чунки Стрикленд у ерга келмаслигини билардим. Мен шунчаки у тикланишини бир ёки икки йил кутишни истамаслигимни айтдим. Мен буни айтишим билан, улар дарров Имавовга камар учун жанг беришди. Шундай дейишмоқда, лекин бу расмийми ёки йўқ, аниқ билмайман. Агар шундай бўлса, шунчаки менга кимдир билан жанг қилишга имкон беринглар, пул ишлаб олай ва камарни тезроқ қайтариб олай.

Мен жанг олишга ҳаракат қиляпман. Октябрда ҳаракат қилдим, декабрда ҳам ҳаракат қиляпман. Агар декабрда ҳеч нарса бўлмаса, танаффус оламан. Жароҳатларим кўп – уларни даволаш керак. Акс ҳолда, операцияларни ортга суриб, ҳар бир жангимга қандайдир муаммолар билан чиқяпман. Ўз муаммоларим, жароҳатларим ҳақида гапиришни унчалик ёқтирмайман, лекин одамлар тез-тез касал бўлишимни билишади. Қалқонсимон безимнинг ярми йўқ, етти марта наркоз олганман, олтита операцияни бошдан кечирганман. Жароҳатлар кўп. Аллоҳ таоло менга шундай тақдир ёзган бўлса керак", – деди россиялик жангчи Адам Зубараевга берган интервьюсида.

Бир ҳафта олдин Хамзат Чимаев Москвада бўлиб ўтган RAF профессионал кураш лигаси турнирида навбатдаги муддатидан аввалги ғалабасини қўлга киритди. У тадбирнинг асосий жангида UFC`нинг ярим ўрта вазндаги собиқ чемпиони Тайрон Вудлини бир ярим дақиқа ичида мағлуб этганди.