Хитой 2027 йилги «Формула-1» мавсумини очиб бериши мумкин

Бу ҳақда ОАВ хабар бермоқда. Австралия Гран-присини бошқа санага кўчириш эса янги пит-бокс биносидаги қурилиш ишлари сабабли имконсиз. «Формула-1» раҳбарияти сентябрь ойида жорий мавсумнинг Қатар ва БААда ўтказилиши режалаштирилган босқичлари тақдирини ҳам ҳал қилади.

The Race нашри хабар беришича, «Формула-1» раҳбарияти Яқин Шарқдаги кескин вазият сақланиб қолган тақдирда Баҳрайн ва Саудия Арабистонида 2027 йилги пойгаларни ўтказишнинг имкони бўлмаслиги мумкинлигини ҳисобга олиб, мавсум тақвими учун захира вариантини тайёрлаган. Асосий муқобил вариант сифатида мавсумни Хитойда бошлаш кўриб чиқилмоқда.

Асосий режага кўра, 2027 йилги мавсум 14 март куни Баҳрайнда старт олиши, 21 март куни Саудия Арабистонида навбатдаги босқич ўтказилиши, шундан сўнг эса кетма-кет учта пойга — Австралия Гран-при (4 апрель), Япония (11 апрель) ва Хитой (18 апрель) Гран-приси бўлиб ўтиши керак. Бироқ минтақадаги вазият мазкур саналарда пойгаларни ўтказишга имкон бермаса, захира режасига кўра мавсум Хитойда бошланади ва ундан кейин Япония босқичи ўтказилади.

Қайд этилишича, Австралия босқичини бундан эртароқ санага кўчиришнинг имкони йўқ. Бунга март ойигача якунланмайдиган янги пит-бокс биноси қурилиши сабаб бўлмоқда. Захира режаси амалга оширилса, Австралия Гран-при, катта эҳтимол билан, апрель ойидаги ўз ўрнида қолади ёки Осиё босқичларидан кейин ўтказилади.