Хитойдаги коронавирус сабабли НХЛда клюшкалар етишмовчилиги вужудга келмоқда

Коронавирус эпидемияси билан боғлиқ вазият туфайли Хитойдан НХЛ клубларига клюшкаларни етказиб беришда муаммоларга дуч келинмоқда.

“Boston Globe” маълумотларига кўра, лига ўйинчиларининг 75 фоизи Хитой фабрикаларида ишлаб чиқариладиган клюшкалардан фойдаланадилар. Клюшкаларни етказиб бериш эса январ ойи охирида тўхтатилди. Сабаби мамлакатда шу вақтда коронавирус тарқалиши билан курашиш бошланди.

Олдинроқ, NBC журналисти Пер Макгуайр таъкидлашича, клуб раҳбарлари унга клюшкаларнинг жиддий етишмовчилиги келиб чиқаётганлиги ҳақида хабар берган. Макгуайрнинг сўзларига кўра, ускуналар бўйича менежерлардан бири жамоада хоккейчилар учун чекловлар борлигини айтди, яъни  улар машғулот учун битта, ўйин учун иккита клюшкадан фойдаланишмоқда.

Журналистлар "Буффало" ва "Детройт" клубларидаги вазият ҳақида қайд этиб ўтишди.

Ишлаб чиқарувчилар ушбу маълумотни рад этишди, аммо вазиятдан хавотирда эканликларини тан олишди.

“Bauer” компанияси вакиллари мавсум охирига қадар дўконларга клюшкалар етказиб беришни айтишди, аммо шахсий буюртмаларни қабул қилиш тўхтатилган.

Хуршида Абдикулова тайёрлади