Хивада ёш мерганлар беллашишди ФОТО

Хоразм вилояти кубогининг 3-босқичида 2001 йилда туғилган ва ундан кичик ёшдаги спортчилар мерганлик маҳоратини намойиш этишди. Хива тумани ўқув спорт техника клуби(ЎСТК)нинг ўқ отиш тирида ўтказилган мазкур мусобақада 17 та жамоанинг 70 нафар ёш спортчиси мерганлик маҳоратини синовдан ўтказди.   

Ҳаёжонли дақиқаларга бой кечган мусобақа якунига кўра, пневматик милтиқдан ўқ отиш биринчилигининг қизлар беллашувида Ўзбекистон ўқ отиш спорти федерацияси вилоят бўлими аъзоси Сара Сотипова ғолибликни қўлга киритди. 

Урганч тумани ЎСТК жамоаси спортчилари Шаҳноза Машарипова шоҳсупанинг иккинчи, Бекпошша Отабоева учинчи поғонасини эгаллади. Ўғил болалар баҳсида Боғот туманидаги “Равон” ЎСТК жамоаси вакили Жавоҳир Рўзметов ғолиб чиқди. Кейинги совринли ўринлар   Урганч тумани жамоасидан Бекзод Рўзметов ва Ўзбекистон ўқ отиш спорти федерациясининг вилоят бўлими жамоасидан Диёрбек Очиловга насиб этди.

Пневматик тўппончадан ўқ отиш машқини бажаришда Ирода Отаназарова (Урганч тумани) зафар қучди. Шукуржон Одамбоева (Шовот тумани ЎСТК) иккинчи, Азиза Исмоилова (Урганч шаҳар ЎСТК) учинчи ўриндан жой олди. 

Ушбу йўналишнинг ўғил болалар биринчилигида шовотлик Нусрат Сапарбоев муваффақият қозонди. Ҳазорасплик Абдувоҳид Абдуллаев, Хива туманининг “Карвон” ЎСТК жамоасидан Холбек Оллаёровлар совриндор бўлишди. 

Эндиликда, энг яхши натижа кўрсатган хоразмлик ёш мерганлар 26-30 июнь кунлари Андижон шаҳрида ташкил этиладиган Ўзбекистон кубогининг 3-босқичида воҳа шарафини ҳимоя қилишади.

Бу мусобақанинг аҳамиятли томони яна шунда бўлдики, Хивага ташриф буюрган спортчилар, уларнинг мураббийлари ички туризм доирасида  қадимий шаҳарнинг тарихий обидалари ва ёдгорликларини ҳам томоша қилишди. 

Икром ХУДОЙБЕРГАНОВ тайёрлади