Хоккей бўйича ЖЧ олдидан. Рақибимиз - Қувайт!

Мусобақада Ўзбекистон миллий терма жамоаси илк бора жаҳон чемпионатида иштирок этади.

ЖЧ давомида терма жамоамизга рақиблик қиладиган Қувайт ҳақида маълумотлар билан танишинг.

IIHF рейтингидаги ҳозирги ўрни: 52

Жаҳон чемпионатидаги энг яхши кўрсаткичи: IV дивизионда 2-ўрин (2024).

Қувайт терма жамоаси жаҳон чемпионатида 4-марта иштирок этади. “Лочинлар” икки марта III B дивизиони саралаш босқичида иштирок этишган, лекин турнирнинг асосий қисмига чиқа олишмаган. Шу тариқа улар тўртинчи дивизиондан юқорига кўтарила олмаган.

IV дивизион бўйича бундан аввалги жаҳон чемпионати Қувайтда бўлиб ўтди. Мезбонлар уйда иккинчи ўринни эгаллашди. Улар Малайзия ва Индонезия термаларини мағлуб этишди, аммо жаҳон турнирда ғолиб чиққан Мўғулистон жамоасига имкониятни бой беришди.

Ўша турнирнинг энг сермаҳсул мергани Қувайт терма жамоаси вакили Илья Дроздецких бўлди. 3та учрашувда қатнашган ҳужумчи 17 (7+10) очко жамғаргани эътиборга молик.

Асли Россиянинг Тюмень шаҳридан бўлган 26 ёшли ҳужумчи 2022 йилдан бери Қувайт терма жамоасида ўйнаб келмоқда. Ўз даврида Илья “Югра Мамонтлари” клуби сафида Россия ёшлар лигасида 150 дан ортиқ ўйин ўтказган, 2018/2019 йиллар мавсумида Харламов кубогида конференция финалига чиққан. Шунингдек, у Курган шаҳрининг “Зауралье” жамоаси сафида Олий хоккей лигасида 17 та ўйин ўтказган.

Қувайт термаси таркибида Россия, Беларусь ва Чехиядан маҳаллийлаштирилган хоккейчилар бор.

Еревандаги турнирда Ўзбекистон ва Қувайт термалари учрашуви 13 апрель куни Тошкент вақти билан соат 18:00 да бошланади.

Мирзаҳаким Тўхтамирзаев