Хоразмлик энг сара ёзги биатлончилар Ўзбекистон кубоги учун баҳс юритишди

Ўзбекистон Республикаси  мудофаасига кўмаклашувчи “Ватанпарвар” ташкилоти Хоразм вилояти кенгашининг Спортнинг техник ва амалий турлари бўйича 2021 йилга мўлжалланган спорт ва оммавий жисмоний тадбирлари календарь режасига асосан уюштирилган мазкур мусобақада вилоятимизнинг барча шаҳар ва туманларидан ташриф буюрган 2003 йилда туғилган ва ундан кичик ёшдаги спортчилар ўзаро баҳс юритишди.

Қизиқарли кечган баҳсларда  Шовот тумани ўқув спорт техника клуби аъзолари юқори натижага эришишди. Хусусан, Зуҳра Рўзимова қизлар орасида, Мирзабек Қадамбоев ўғиллар орасида ғолибликни қўлга киритишди. Шунингдек, қизлар биринчилигида боғотлик Сарвиноз Султонбоева иккинчи, Қўшкўпир туманидаги “Ўртаёп” ўқув спорт техника клуби аъзоси Зиёда Жумамуратова  учинчи ўринни эгаллашди. Ўғил болалар мусобақасида эса хивалик Жўшқин Қадамов ва шовотлик Фозилжон Исмоилов совриндор бўлди.

Якуний сарҳисобларга кўра, умумжамоа ҳисобида Шовот тумани  ўқув спорт техника клуби жамоаси шоҳсупанинг биринчи поғонасига кўтарилиб, ёзги биатлон бўйича 2021 йилги Хоразм вилояти кубогини қўлга киритди.   Боғот тумани   ўқув спорт техника клуби иккинчи, Хива   тумани ўқув спорт техника клубининг ёш ёзги биатлончилари учинчи ўринни банд этишди.

Мусобақанинг ёпилиш маросимида Ўзбекистон Республикаси мудофаасига кўмаклашувчи “Ватанпарвар” ташкилоти Хоразм вилоят техник ва амалий спорт турлари маркази директори Одилбек Ибрагимов  ғолиб ва совриндор спортчиларни эришган ютуқлари билан қутлаб, барчасини тегишли даражада  тақдирлади.

Эндиликда, совринли ўринларни эгаллаган хоразмлик ёзги биатлончилар жорий йилнинг 10-13 март кунлари Тошкент вилоятининг Чирчиқ шаҳрида уюштириладиган Ўзбекистон кубоги мусобақасида воҳамиз шарафини ҳимоя қилишади.

Икром ХУДОЙБЕРГАНОВ, Хоразм вилоятидан.