Хуршидбек Норматов: “Бугунги жанг менга сабоқ бўлди”

Ҳар иккала боксчи ҳам бугунги жангларига қадар мағлубиятга учрашмаган эди. Ҳамюртимиз кучли рақибига фаолиятидаги илк мағлубиятни тақдим эта олди. Норматов Dibella Entertainment промоутерлик компанияси билан шартномага эга. Биз бугунги жангдан сўнг Хуршидбекнинг фикрлари билан қизиқдик.

“Жанг мен учун ўйлаганимдан ҳам қийинроқ кечди. Осон ғалабага эришаман, деб бироз ўзгача тайёргарликда рингга чиққандим. Очколар ҳисобига кўра яққол устунлик билан ғалаба қозонганимга қарамай, бу мен учун яхшигина сабоқ бўлди. Кейинги жангларимда бу хатоларни такрорламасликка ҳаракат қиламан.

Бугунги кунда Гари Старк ва Андре Розиер билан ҳамкорликда ишлаяпмиз. Шу мураббийлар қўл остида машғулотларни ўтказиб, жангларга тайёргарлик кўряпман.

Режага кўра кейинги жангимни февраль ёки март ойларида ўтказишим керак. Шундан сўнг кичик таътил учун Ўзбекистонга қайтаман. Ҳозир ота-онам ҳам мен билан бирга АҚШдалар. Уларнинг дуолари билан ғалабаларга эришяпман”, - деди Норматов.