Ян: "Махачев Хабибни ортда қолдирди деб ўйламайман"

Энг енгил вазн тоифасида россиялик UFC собиқ чемпиони Петр Ян ҳамюрти, енгил вазн тоифасида амалдаги UFC чемпиони Ислам Махачев ҳақида гапирди.

"Ислам Хабибни ортда қолдирди, деб ўйламайман. Ишончим комил, у яна икки ёки уч марта камарини ҳимоя қилиши керак, кейин шунга қараб, уларни таққослаш мумкин. Умид қиламанки, Махачев ва Волкановски ўртасида реванш ўтказилади. Қачонлигини билмайман, лекин бу ҳамма учун қизиқарли бўлади. Бу йигитларнинг ўзига ҳам қизиқ, иккаласи ҳам янада жиддийроқ жанг қилишади", - дея Яннинг сўзларини келтиради Vprognoze.ru.

Эслатиб ўтамиз, Ислам Махачев ва Алекс Волкановски ўртасидаги чемпионлик жанги 12 февраль куни Перт шаҳрида (Австралия) ташкил этилган UFC 284 мусобақаси доирасида ўтказилган эди. Ушбу жангда Ислам Махачев ҳакамлар қарори билан ғалаба қозониб, ўз камарини сақлаб қолган эди.

Маълумот учун, Петр Ян навбатдаги жангини 11 март куни грузиялик Мераб Двалишвилига қарши ўтказади. Мазкур оқшом доирасида ҳамюртимиз Маҳмуд Мурадов доғистонлик Абусупьян Магомедовга қарши октагонга кўтарилади.