Яна бир футболчимиз Топ-5 чемпионатига йўл олишга яқин турибди

Гап Ўзбекистон миллий терма жамоасига номзод, ёшлар терма жамоамизнинг етакчиси аъзоси, Осиё чемпиони, жаҳон чемпионати иштирокчиси, айни пайтда Самарқанднинг "Динамо" клуби шарафини ҳимоя қилаётган Жаҳонгир Ўрозов ҳақида кетмоқда. 

Ўрозов Россиянинг "Чертанова" футбол клубида фаолиятини бошлаган. Кейин "Бунёдкор" клубига кўчиб ўтган. Шуҳрат Мақсудов бош мураббийлигидаги "қалдирғочлар" сафида 2022 йилги мавсумда "Локомотив"га қарши сафар ўйинида олий лигада дебют қилган. 2023 йилнинг августида Туркия биринчи дивизиони вакили "Эюпспор" клуби билан 5 йиллик шартнома имзолаган. Арда Туран мураббийлигидаги бу турк клуби 2023/2024 мавсум чемпиони сифатида Туркия Суперлигасига йўл олди, истеъдодли ҳимоячимиз эса кичик олтин медалларни қабул қилиб олди. 

Ўтган йилнинг иккинчи даврасида Самарқанднинг "Динамо" жамоасига ижара асосида келди. Бош мураббий Вадим Абрамов ишонч билдирган футболчи иккинчи давранинг тўлиқ 13 та ўйинида майдонга тушди. Шу йил "Динамо" раҳбарияти "Эюпспор" клубидан Ўрозовнинг транфсерини 100 000 доллардан сал кўпроқ маблағ эвазига сотиб олди. 

Жаҳонгир Ўрозовнинг агенти Шахриёр Эшбоевнинг бизга хабар беришича, айни пайтда Франция олий дивизионида доимий тарзда кучли бешталикда юрадиган клуби билан музокаралар якуний босқичига келган. Трансфер 70-80 фоизга ҳал бўлган. Шу сабабдан ҳам, Италиянинг "Кремонезе", Бельгиянинг "Зюлте Варегем", Болгариянинг ЦСКА 1948, Россиянинг "Краснодар" ва "Сочи" ҳамда Эрон клубларидан бўлган таклифларга рад жавоби берилган. Икки клуб ўртасида келишув расмий тус олиши билан бу ҳақда хабар берамиз.