Яна бир сенсация. Саккари учун Australian Open якунланди

Сайёрамизнинг олтинчи ракеткаси Мария Саккари Австралия Очиқ чемпионатидаги иштирокини якунлади. Грециялик теннис маликаси учинчи даврада WTA рейтингида 87-поғонада бораётган хитойлик Чжу Линга кутилмаганда 6/7(3), 6/1, 4/6 ҳисобида имкониятни бой бериб, Australian Open турниридаги иштирокини тўхтатди.

Теннисчиларнинг ўзаро учрашувларидаги ҳисоб мувозанати тикланди - 1:1. Икки соату 36 дақиқа давом этган баҳсда Саккари 6, Чжу Линь 3 та эйс зарбасини амалга оширди. Олтита қўшхато Марияга қимматга тушди. 28 ёшли Чин юрти вакиласи фаолиятида илк бор Топ-10 теннисчисини мағлубиятга учратди. Энди Чжу Линь беларуслик Виктория Азаренкога қарши кортга чиқади.