"Яшил макон" умуммиллий лойиҳаси доирасида Чирчиқ ОПСТТМда ҳашар ўтказилди, маҳорат дарслари ташкил этилди ФОТОГАЛЕРЕЯ

Жумладан, 28-29 октябрь кунлари Тошкент вилояти маҳаллаларида ҳам кузги дарахт экиш мавсумини юқори савияда ташкил этиш учун "Обод ва файзли маҳалла - юрт кўрки" ва "Янги Ўзбекистон - яшил маконда бирга яшайлик!" шиорлари остида умуммиллий ҳашар ўтказилмоқда. 

Хусусан, кеча 28 октябрь куни Чирчиқ олимпия ва паралимпия спорт турларига тайёрлаш марказида "Яшил макон" умуммиллий лойиҳаси доирасида марказ директори Равшан Гафуров бошчилигидаги ишчи-ходимлари иштирокида ҳашар ташкил этилиб, мевали ва манзарали дарахт кўчатлари экилди. 

Мазкур "Обод ва файзли маҳалла - юрт кўрки" ва "Янги Ўзбекистон-яшил маконда бирга яшайлик!" шиорлари остидаги ҳашарда марказнинг собиқ битурувчиларидан - жаҳон чемпиони, "Ханчжоу-2022" Осиё ўйинлари совриндори Достон Ёқубов, "Жакарта-2018" Осиё ўйинлари ва жаҳон чемпионати ғолиблари Адҳамжон Эргашев, Муҳаммадқодир Тоштемиров ҳамда икки карра Осиё чемпиони, "Ханчжоу-2022" Осиё ўйинлари ғолиби Артём Штурбабинлар ҳам иштирок этиб, мевали ва манзарали дарахт кўчатлари экишди, ободонлаштириш ишларига кўмаклашишди. 

Шунингдек, марказнинг спортчи-ўқувчилари учун ушбу номдор спортчилар иштирокида "Мен қахрамонимга эргашаман" шиори остида маҳорат дарслари ўтказилди. Ўзаро суҳбат асосида ўтган маҳорат дарсларида ўқувчилар қизиқтирган саволларига муносиб жавоб олишди. Учрашув сўнггида чемпион спортчиларга эсдалик совғалари улашилди. 

Ушбу жараёнларда Тошкент вилояти Ёшлар сиёсати ва спорт бош бошқармаси бошлиғи Рустам Бобоқулов иштирок этди.

Илҳом РАҲМОНОВ тайёрлади