Яхши хабар! Азизбек Темиров ҳам акаси сингари фаолиятини АҚШда давом эттирадиган бўлди!

У LFA (Legacy Fighting Alliance) лигаси билан шартнома имзолади. Бу ҳақда Tapology нашри хабар бермоқда. Ҳозирча шартнома тафсилотлари маълум эмас. Бироқ Азизбекнинг дебют жанги бўйича маълумотлар бор.

Темиров 2025 йилнинг 11 январь куни АҚШнинг Калифорния штати, Лемор шаҳрида ташкил этиладиган LFA 199 турнири доирасида октагонга кўтарилади. Унга ўша куни россиялик Магомед Шахбанов рақиблик қилади. 

LFA 199 турнирининг марказий жанги бразилиялик Ари Фариас ва Қозоғистон вакили Сабит Жусупов ўртасида кечади. Шунингдек, мусобақа доирасида россиялик таниқли поп-ММА жангчиси Шовхал Чурчаев ҳам LFA'даги дебют жангини ўтказади.

Ҳозирча Азизбек Темировнинг ўзи LFA'га ўтгани ҳақидаги маълумотларни тасдиқлаганича йўқ. Ҳамюртимиз фаолияти давомида 5 та жанг ўтказиб, уларнинг барчасида ғалаба қозонган. Магомед Шахбанов ҳисобида эса 4 та ғалаба бор.