04 апр 16:00
Янгиликлар

Оғир атлетика

Ёш оғир атлетикачиларимиз жаҳон чемпионатидаги иштирокларини бошладилар

2-3 апрель кунлари Таиланд пойтахти Бангкок шаҳрида Халқаро Оғир атлетика федерациясининг навбатдаги Конгресси бўлиб ўтди.

Унда Ўзбекистон Оғир атлетика федерацияси раисининг биринчи ўринбосари Шаҳрулло Маҳмудов ҳам иштирок этди. Конгресс эртага, 4 апрель куни старт оладиган ўсмирлар ўртасидаги жаҳон чемпионати арафасида ташкил этилди ва сўнгги Олимпия цикли, яъни 2013-2016 йилларда қилинган ишларга мантиқий якун ясаб берди. Маълумот учун, Шаҳрулло Маҳмудов Осиё Оғир атлетика федерациясининг вице-президенти, Халқаро оғир атлетика федерацияси техник қўмитаси аъзоси ҳисобланади.

Конгрессда бир қатор масалалар муҳокама этилди. Жумладан, айтиб ўтганимиздек 2013-2016 йиллар мобайнида Халқаро Оғир атлетика федерацияси томонидан қилинган ишлар, ўтказилган мусобақалар, сарфланган маблағлар хақида ҳисобот берилди. Шунингдек, навбатдаги Олимпия цикли 2017-2020 йиллар учун мўлжалланган истиқбол режаси, маркетинг масалалари, допинг назорати масалаларидаям фикр алмашилди.

Эртадан энди Бангкокда ўсмирлар ўртасидаги жаҳон чемпионати старт олади. Мусобақада 57 та давлатдан 445 нафар спортчиларнинг иштирок этиши кутилаяпти. Ўзбекистон терма жамоаси ҳам мусобақада тўлиқ таркибда қатнашади. Бугун кечурун, 16 та спортчи, 4 та мураббий ва битта ҳакамдан иборат делегациямиз аъзолари Тошкент халқаро аэропортидан жаҳон чемпионатида иштирок этиш Таиланд сафарига жўнаб кетишади. 10 апрелга қадар давом этадиган мусобақада қуйидаги спортчиларимиз юртимиз шарафини ҳимоя қилишади:

1. Саидмухтор Саидахроров 94 кг

2. Азамат Рамазанов 62 кг

3. Асадбек Нариманов 62 кг

4. Муҳаммадқодир Тоштемиров 69 кг

5. Александр Ли 94 кг

6. Сарвар Тоштемиров 69 кг

7. Дилмурод Салимов 77 кг

8. Азимжон Ходжиев 85 кг

9. Долера Давронова 75 кг

10. Гулноза Ахмадова 75 кг

11. Зухра Отажонова 48 кг

12. Шахлохон Абдуллаева 58 кг

13. Турсуной Жабборова 69 кг

14. Кумушхон Файзуллаева 58 кг

15. Шодмоной Очилова 75 кг

16. Зарнигор Абдурахмонова 63 кг

Биз учун эътиборга молик жиҳати шундаки мазкур жаҳон чемпионатида 2018 йилда Аргентинада бўлиб ўтадиган III ўсмирлар Олимпия ўйинларига лицензиялар ўйналади. Маълумотларга кўра, жаҳон чемпионатида 1-7 ўринни эгаллаган терма жамоалар 2+2 кўринишида лицензияларга эга бўлишади. Яъни умумжамоа ҳисобида кучли еттиталикка кирган давлатлар учун 2 та ўғил болалар ва 2 та қизлар учун ўсмирлар Олимпия ўйинлари йўлланмаси ажратилади. 8-17 ўринларни банд этган терма жамоаларга эса 1+1 кўринишида йўлланмалар тақсимланади.

Биз бўлажак жаҳон чемпионатида терма жамоамиз аъзоларига омад ва зафарлар тилаб қоламиз ва албатта юртимизга ёруғ юз билан қайтишларига тилакдошмиз.

Ҳавола :

Манба : Olympic.uz

Рейтинг: