“Binokor” yoshlari xalqaro turnir g'olibi!

O'zbekiston Respublikasi Jismoniy tarbiya va sport vazirligi hamda mamlakat xokkey federaciyasi tomonidan uyushtirilgan mazkur musobaqada O'zbekiston, Latviya, Qozog'iston va Qirg'izistondan jami 5 jamoa ishtirok etdi.

Xalqaro turnir g'olibligi uchun “Riga” (Latviya), “Qaysar” (Qozog'iston) va “Olg'a” (Qirg'iziston) jamoalari bilan birga mamlakatimizning “Binokor” va “Toshkent siti” klublari yosh xokkeychilari muzga chiqishdi.

Musobaqa Nizomiga ko'ra g'olibni aniqlash uchun davraviy tizimda birinchi va ikkinchi o'rinni egallagan jamoalar o'rtasida hal qiluvchi final o'yini o'tkazilishi belgilangan edi.

Ikki kun davom etgan davraviy tizimdagi bahslar yakunida to'rt o'yinda to'rtta g'alaba qayd etgan Latviyaning “Riga” jamoasi yoshlari hamda uchta o'yinda g'olib chiqqan jamoamiz “Binokor” finalda bahs olib borishdi.

Hal qiluvchi o'yinda mehmonlar ustida 1:0 hisobida g'alaba qozongan “Binokor” yoshlari xalqaro turnir bosh sovrinini qo'lga kiritishdi.

Yana bir jamoamiz “Toshkent siti” musobaqada uchinchi o'rinni egallagan bo'lsa, to'rtinchi va beshinchi o'rinlar mos ravishda “Qaysar” va “Olg'a” jamoalariga nasib etdi.

Kecha ushbu xalqaro turnir g'oliblarini tantanali taqdirlash marosimi bo'lib o'tdi.

Unda Jismoniy tarbiya va sport vaziri o'rinbosari SHarifjon Mo'minjonov, Milliy olimpiya qo'mitasi Bosh kotibi Jasur Matchanov, O'zbekiston xokkey federaciyasi raisi o'rinbosari Iskandar SHodiev va boshqalar ishtirok etdi.

Musobaqada ikkinchi o'rin olgan Latviyaning “Riga” jamoasi murabbiylariga zar to'nlar kiydirildi. G'olib va sovrindor bo'lgan yoshlarga kubok va medallar topshirildi.