16 iyu 12:22
Yangiliklar
Odiljon Aslonov: Taxminim to'g'ri chiqdi, ammo...
Quyida ana shu intervyuni o'qishingiz mumkin.
- Assalomu alaykum, Odiljon. Avvalambor, taklifimizni rad etmaganingiz uchun tashakkur.
- Valaykum assalom, taklif uchun rahmat.
- Odiljon, ushbu turnir qay darajada tashkillashtirilgan? Umuman, tashkiliy masalalar borasida fikringiz qanday?
- To'g'risi, ushbu turnir va uning tashkiliy masalalari alo darajada. Biz uchun barcha sharoitlar muhayyo qilingan. Yashash uchun mehmonxona, ovqatlanish, har kunlik mashg'ulot o'tkazishimiz uchun sport zali taqdim etilgan. Murabbiylarimiz qo'l ostida ushbu zallarda mashg'ulot olib boryapmiz. SHu fursatdan foydalanib, barcha tashkilotchilarga Osiyo terma jamoasi sportchilari nomidan barchasi uchun minnatdorchilik bildiraman.
- Turnir doirasida hozirgacha ikkita jang o'tkazib ikkisida ham g'alaba qozondingiz. SHu o'tkazilgan janglar va undagi raqiblaringiz haqida nima deya olasiz?
- Ochig'i, afrikalik raqibimni tanimayman. Bilishimcha, u proffessional boksda 23 ta jang o'tkazgan ekan. Rossiyalik raqibimni esa yaxshi taniyman. O'tgan yil Serbiyada bo'lib o'tgan Jahon chempionati bronza medali sohibi. Havaskor boksda ham bir nechta xalqaro musobaqalar g'olibi hisoblanadi. Bu ikki kuchli bokschini mag'lub etganimdan xursandman.
- Turnirning ikkinchi turida Osiyo va Rossiya terma jamoalari o'zaro bahs olib borishdi. Raqib jamoa bokschilari qanday taassurot qoldirishdi?
- Rossiyalik barcha charm qo'lqop ustalari havaskor va proffessional boksda o'z o'rniga ega. Ko'plab musobaqalarda g'oliblikni qo'lga kiritishgan. Bir qiziq holatni sizga aytsam, Rossiya terma jamoasi bilan jang oldidan kichik hisob qayd etilishini va unda g'alaba qozonishimizni taxmin qilgandim. Ha, kichik hisob qayd etildi, lekin raqib foydasiga. Ozroq omadimiz kelmadi va kichik hisobda mag'lub bo'ldik.
- Amerika, Afrika va Rossiya terma jamoalari tarkibidagi siz uchun 3 nafar eng yaxshi bokschi?
- Xo'p desangiz, Rossiya terma jamoasi tarkibidan o'zim kuchli deb hisoblagan uch nafar eng yaxshi bokschini sanab beraman. Tokio Olimpiadasi chempioni Albert Batirgaziev, jahon chempioni Muslim Gadjimagamedov, IBO yo'nalishi reytingida 2-o'rinni egallab turgan Pavel Silyagin. Sanayversam, bunday kuchli bokschilar juda ko'p.
- Osiyo terma jamoasi safidagi jamoadoshlaringiz janglaridan tashqari raqib jamoalar bahsini ham kuzatib boryapsizmi?
- To'g'risini aytsam, men bironta jangni kuzatganim yo'q. Barcha janglarni Ravshan Xodjaev boshchiligidagi murabbiylarimiz kuzatishyapti va shunga monand har birimizga alohida uslublarni singdirishmoqda.
Maqsud Komilov suhbatlashdi
O'zbekiston boks federaciyasi Buxoro viloyat bo'limi matbuot xizmati
Fikrlar