Pekin-2022. Kenten Fiyon-Maye ikki karra Olimpiada chempioni!

Biatlon bo'yicha erkaklar o'rtasida 12,5 km masofaga o'tkazilgan taqib etish poygasi yakunlandi. Unda franciyalik Kenten Fiyon-Maye g'alaba qozondi. U barcha o'q otish maydonida bexato harakat qildi va yakunda Olimpiada chempioniga aylandi. Ikkinchi o'rinni norvegiyalik tajribali Tarey Byo egalladi. Kuchli uchlikka esa rossiyalik Eduard Latipov yakun yasab berdi. 

Franciyalik Kenten Fiyon-Maye uchun bu medal Pekin Olimpiadasidagi to'rtinchisi bo'ldi. Bugun esa Fiyon-Maye ikkinchi oltin medaliga ega chiqdi. U individual poygada ham chempionlikni tantana qilgan edi. SHuningdek, Fiyo-Maye sprint va aralash estafetada kumush medal sohibi bo'lgan edi. 

Tarey Byo uchun bugungi medal Pekin Olimpiadasidagi uchinchi, Olimpiya o'yinlaridagi beshinchisi hisoblanadi. Byo Pekin Olimpiadasida aralash estafetada oltin, sprint bahslarida esa kumush medal egasiga aylandi. U shuningdek, Vankuver-2010 Olimpiadasida chempionlikni tantana qilgan bo'lsa, Pxyonchxang-2018 da shohsupaning ikkinchi o'rnini band etgan. 

Eduard Latipov ushbu Olimpiadada ikkinchi bronza medalini qo'lga kiritdi. Bir necha kun avval u aralash estafetada jamoasi bilan uchinchi o'rinni egallagandi.

Biatlon. Taqib etish poygasi 12,5 km. Erkaklar. 

1. Kenten Fiyon-Maye (Franciya) – 39.07,5 (0)

2. Tarey Byo (Norvegiya) – 28,6 (1)

3. Eduard Latypov (Rossiya) – 35,3 (1)