Pekin-2022: Qishki Olimpiya o'yinlariga tayyorgarlik muhokama qilindi

Kecha MOQ, Jismoniy tarbiya va sport vazirligi Qishki va murakkab texnik turlari bo'yicha Respublika oliy sport mahorat maktabi, O'zbekiston qishki sport turlari associaciyasi, O'zbekiston xokkey federaciyasi vakillarining Pekin-2022 qishki Olimpiya o'yinlariga tayyorgarligi masalalariga bag'ishlangan onlayn yig'ilishi bo'lib o'tdi. Unda MOQ Bosh kotibi Oybek Kasimov, Jismoniy tarbiya va sport vazirining birinchi o'rinbosari Ravshan Irmatov, shuningdek, qishki sport turlari bo'yicha bir qator malakali mutasaddilar ishtirok etishdi.

Uchrashuv kun tartibidan Pekin-2022 qishki Olimpiya o'yinlariga ko'rilayotgan tayyorgarlik, bu borada olib borilayotgan ishlar, qaysi yo'nalishlarda yo'llanmalar olishimiz mumkinligi, shuningdek, qishki sport turlarini yurtimizda yanada rivojlantirish masalalari o'rin oldi. Uchrashuv ishtirokchilari o'z yo'nalishlari bo'yicha olib borilayotgan ishlar, muammoli vaziyatlar va ularning echimlari xususida to'xtalishdi.

Tadbir davomida MOQ Bosh kotibi o'z fikrlarini bildirib o'tdi.

“Vaziyat bilan barchamiz yaxshi tanishmiz. Ha, avval ushbu sport turini moliyalashtirish masalasida muammoga duch kelganmiz. Hozir esa hukumatimiz bizni har qachongidan ham kuchli qo'llab-quvvatlamoqda. Biz esa hamjihatlikda o'z ishimizni ko'rsatishimiz lozim”, – dedi Oybek Kasimov.

Suhbatda mutaxassislar Prezidentimiz tomonidan qabul qilingan “Qishki sport turlarini rivojlantirish chora-tadbirlari to'g'risida”gi PQ-4583 qaror ijrosiga ham alohida to'xtalishdi. Aytish mumkinki, bu borada olib borilayotgan ishlarning barchasi ham amalda o'z tasdig'ini topmayapti. Onlayn yig'ilish ishtirokchilari kelajakda bu jihatlarga jiddiyroq etibor qaratish, sohadagi kamchiliklarning oldini olish borasida hamkorlikda ishlashga kelishib olishdi. SHuningdek, har bir mutaxassisdan o'z yo'nalishida mavzuga doir taklif va chora-tadbirlar rejasi taqdim qilinishi so'raldi.