Раҳимова Miami Open асосий тўр илк даврасида дунёнинг 63-ракеткасини осонликча мағлуб этди

Мусобақанинг саралаш баҳслари финал учрашувида мамлакатимизнинг биринчи ракеткаси Камилла Раҳимова дунёнинг 68-ракеткаси, австралиялик 21 ёшли Талиа Гибсонга 3/6, 4/6 ҳисобида имкониятни бой бериб қўйганди. Қизиғи, вакиламиз саралаш баҳсларининг "лаки-лузер", яъни омадсиз омадлиси сифатида асосий тўрга қўйилди. 

Бугун тонг саҳарда Раҳимова 1/64 финал босқич учрашувида аргентиналик Солана Сиеррага қарши кортга чиқди. Эллик саккиз дақиқа давом этган баҳсда теннисчимиз дунёнинг 63-ракеткасига ҳеч қандай имконият қолдирмади - 6/1, 6/3. Камилла 1, Солана 3 та эйс зарбасини амалга оширди. Қўшхатолар Раҳимовада кўпроқ бўлди - 4 га 3.     

Таққослаш учун, Камилла Раҳимова айни пайтда WTA рейтингида 82, Сиерра 63-ўринни эгаллаб турибди. Бу теннисчиларнинг ўзаро ўтказган иккинчи учрашуви бўлди - 2:0. Шу йилнинг 13 февраль куни Дубайда ўтказилган турнирнинг саралаш баҳсларида ҳам Раҳимова Соланани мағлубиятга учратган эди. 

Энди Камилла Раҳимова 1/32 финалда дунёнинг 28-ракеткаси, украиналик Марта Костюкка қарши кортга чиқади. Марта тўғридан-тўғри иккинчи босқичдан ўз иштирокини бошлайди. Бу учрашув бугун бизнинг вақт билан соат 01:00да бошланади. Бу теннисчиларнинг ўзаро ўтказадиган иккинчи учрашуви бўлади. Бундан беш йил аввал Истанбулда ўтган турнирда Костюк Раҳимовани 6/4, 6/3 ҳисобида таслим этган эди.