12 окт 13:12
Янгиликлар

Теннис

15 ёшли Гофф 15 йил олдин Тошкентда ўрнатилган рекордни янгилади

Сайёрамизнинг 110-ракеткаси 15 ёшли Кори Гофф Австриянинг Линц шаҳрида ўтказилаётган WTA турнирининг ярим финалига йўл олди.

Америкалик ёш иқтидор эгаси Upper Austria Ladies Linz турнирининг чорак финалида голландиялик Кики Бертенсни 7/6(1), 6/4 ҳисобида мағлуб этишнинг уддасидан чиқди. Бертенс дунё рейтингида 8-ўринни эгаллаб тургани эътиборга молик ҳолат. Турнир шов-шувига айланган учрашув 1 соату 36 дақиқа давом этган.

Бу теннисчиларнинг ўзаро ўтказган илк учрашуви эди. Бугун Гофф ярим финалда германиялик Андреа Петковичга қарши кортга чиқади. Кори 2004 йилдан бери WTA турнирларида ярим финалга чиққан энг ёш теннисчига айланди. Бундан 15 йил аввал "Тошкент Опен-2004" турнирида Николь Вайдишова ярим финалга етиб келган энг ёш теннисчига айланганди. Ўшанда Николь 15 ёшу 177 кунлик эди.