Шоҳжаҳон Эргашев 13-жангини ўтказди

Енгилмас чарм қўлқоп устамиз АҚШнинг Бруклин шаҳарчасида шу кунгача вакант бўлиб турган WBA International чемпионлик камари учун рингга кўтарилди. Бугунги жангда Эргашевга хитойлик Ванг Жимин рақиблик қилди.

Ўн раундга мўлжалланган жанг ғолиби очколар ҳисобига кўра аниқланди. Барча раундларни яққол устунлик билан ўтказган ҳамюртимиз рақибини таслим этди. Ҳакамлар 100:90, 99:91, 100:90 ҳисобидаги ғалабани Шоҳжаҳонга тақдим этишди. Боксчимиз WBA International чемпионлик камари соҳибига айланди.

Маълумот учун, хитойлик боксчи профессионал фаолияти давомида бугунгиси билан қўшиб ҳисоблаганда 13та жанг ўтказиб, уларнинг 10тасида ғалаба қозонган. Бугун у учинчи мағлубиятини қабул қилиб олди. Эргашев эса 13та жанг ўтказиб, уларнинг барчасида рақибларини таслим этган. Ҳисобида 12та нокаут. Ҳамюртимиз илк бор жангини тўлиқ ўтказди.