Кормье Гэтжини огоҳлантирди: "Бундай қилиш ярамайди"

Агар Жастин Гэтжи UFC енгил вазн тоифасидаги чемпионлик камарини Конор Макгрегор билан бўладиган пул эвазига жанг учун алмаштиришга қарор қилса, у ўзининг спорт меросига тузатиб бўлмас зарар етказади, деб ҳисоблайди дунёнинг энг кучли лигаси шарҳловчиси Даниэль Кормье.

"Мен қаердадир унинг Конор билан жанг қилиш учун чемпионлик камаридан воз кечишга тайёрлигини айтганини ўқидим. Бундай қилиш ярамайди. Бу унинг меросига зарар етказади. Титулдан воз кечиб, пул учун қилинадиган жангни жаҳон чемпиони мақомидан устун қўйиш – нотўғри қарор", – деди Кормье ўзининг YouTube каналидаги видеода.

Аввалроқ Кормье ўз ватандошининг олдида учта реал вариант борлигини айтган эди: Арман Царукян билан ҳимоя жанги, Илия Топурия билан реванш ёки фаолиятини якунлаганини эълон қилиб, чемпионлик камаридан воз кечиш. Шу билан бирга, UFC`нинг собиқ икки вазн тоифасидаги чемпиони Жастин учун бу вариантларнинг ҳеч бири осон эмаслигини таъкидлаганди. Гэтжи ўз фаолиятидаги энг яхши жангини ўтказиб, бирлаштирувчи жангда "Эл Матадор"ни шов-шувли тарзда мағлуб этди.

Жастин Гэтжининг ўзи эса янги йилдан сўнг, барча жароҳатларини даволаб, оиласи ва жамоаси билан маслаҳатлашиб, барча ижобий ва салбий томонларини ўйлаб кўргач, навбатдаги қадами ҳақида қарор қабул қилишини маълум қилган.