«1:6». Қозоқ матбуоти «Странжа»да боксчиларимиздан учралган мағлубиятларни шундай изоҳлади

Қозоғистоннинг spоrts.kz интернет нашри ўз боксчиларининг «Странжа» турниридаги иштирокини сарҳисоб қилди.

«Келинг, фақат азалий рақибимиз – Ўзбекистон билан солиштирсак, уларда 8 нафар иштирокчи ва 7 та совринли ўрин. Шундан 6 нафари чемпион, яна бири учинчи ўринни эгаллаган», - дейилади манбада.

Қўшни мамлакатдаги ҳамкасбларимиз ўз вакилларининг қайси ўзбек боксчиларидан мағлуб бўлганини бирма-бир ёзиб «Қозоғистон - Ўзбекистон - 1:6», - дея изоҳ берди.

«Кўриниб турибдики, Париж Олимпиадасигача вақт кўп, хулоса чиқариш учун ҳали етарлича вақт бор. Аммо, Ўзбекистонда бу Ўйинларнинг бокс турнирига ҳозирданоқ мақсадли тайёргарлик кўрилаётганга ўхшайди. Эҳтимол, улар тўғри иш қиляптилар: ахир, Олимпиадага икки йил қолди. Олимпиада мукофотлари учун даъволаримизни тақдим этиш вақти келганида, ортга қарашга вақтимиз бўлмайди...

Лекин биринчи навбатда, биз ҳали ҳам Олимпиада йўлланмаларини қўлга киритишимиз керак. Эй Худо, лицензион турнирларда ўзбеклар бизга тўсқинлик қилмасин», - дея якунланади мақола.