Дмитрий Биволнинг жанг санаси, манзили ва рақиби маълум

Россиялик жаҳон чемпиони ўз камарига расмий ва мажбурий даъвогар Хильберто Рамиресга қарши рингга кўтарилади. Чемпионлик жанги 5 ноябрь куни Бирлашган Араб Амирликларида бўлиб ўтади. Аслида кеча промоутерлар ўртасида жангни ташкил этиш ҳуқуқи бўйича савдо ўтказилиши керак эди. Лекин WBA ташкилоти боксчиларнинг жамоалари ўзаро келишиб олганини маълум қилди.

"Дмитрий Бивол - Хильберто Рамирес жанги юзасидан ўтказилиши керак бўлган промоутерлик савдоси бекор қилинди. Иккала томон ҳам жангни 5 ноябрь куни БААда ўтказишга келишиб олишди", — дейилади WBA расмий баёнотида.

Келишув Matchroom Boxing (Бивол) ва Golden Boy (Рамирес) промоутерлик компаниялари ўртасида амалга ошган. Жанг DAZN стриминг плаформаси орқали трансляция қилинади. Ушбу стриминг сервиси ҳар иккала боксчи билае ҳамкорлик қилади. 

"Биз Абу-Дабига отланяпмиз. Рамирес 5 ноябрь куни Биволга қарши кечадиган жангда ярим оғир вазн тоифасида дунёнинг энг кучли боксчиси эканини исботлайди", — деди Golden Boy промоутерлик компанияси раҳбари Оскар Де Ла Хойя.

Эслатиб ўтамиз, ҳар икки боксчи ҳам охирги жангларини шу йилнинг май ойида ўтказишганди. Дмитрий Бивол Сауль "Канело" Альварес устидан тарихий ғалабага эришган бўлса, иккинчи ўрта вазнда собиқ жаҳон чемпиони бўлган Рамирес эса даъвогарлар жангида Доминик Бёзелдан устун келганди.