Биволни жиддий синов кутмоқда! Унинг рақиби — Хильберто Рамирес ҳақида нималар биласиз?

Дмитрий Бивол - Хильберто Рамирес жанги қачон бўлади?

Дмитрий Бивол 5 ноябрь куни Абу-Дабида WВА камарини ҳимоя қилади. Дмитрий мағлубият нималигини билмай келаётган Хильберто Рамиресга қарши рингга чиқади. Боксчиларнинг ёши тенг бўлишига қарамай, Рамирес Биволдан икки баробар кўп жанг ўтказган.

Жанг ташкил этилишига асосий сабаблар.

Дастлаб Биволнинг жамоаси британиялик Жошуа Буатсига қарши ҳимоя жанги ўтказмоқчи эди. Аммо, Бутунжаҳон бокс ассоциацияси (WВА) Бивол жамоасининг таклифини рад этиб, Рамиресга қарши мажбурий ҳимоя жанги ўтказишга қарор қилди. Шу тариқа WВА музокара олиб бориш учун 30 кун вақт беришди.

Шундай бўлса-да, Эдди Хирн барибир Биволни Буатсига қарши ҳимоя жанги ўтказишга ҳаракат қилди. 12 август куни Хирннинг бу таклифи рад этилди. Шу тариқа, россияликнинг Рамирес билан музокара қилишдан бошқа иложиси қолмади. Агар Бивол камардан воз кечмаса.

Хильберто Рамирес ҳақида нималар биласиз?

Хильберто Рамирес - Оскар Де Ла Хойанинг яна бир муваффақиятли лойиҳаси ҳисобланади. У 44 та жанг ўтказиб, 44-0 натижани қайд этган. Аввалроқ у суперўрта вазн тоифасида WBO чемпиони бўлган. Бироқ, кўплаб жангчилар бу дивизионда мексикаликдан қочишди, бу Хильбертони яримоғир вазн тоифасига ўтишга ундади. Худди шу воқеа бу ерда ҳам такрорланди. Рамирес чемпионлик йўлида барча даъвогарларни ишончли тарзда мағлуб этди.

"Бивол билан жанг қилишни кутяпман. Икки йилдан бери унинг ортидан бораман. Мен ярим оғир вазндаги энг зўр боксчиман ва буни исботламоқчиман", — деди Рамирес.

Рамирес ярим оғир вазнда қайси боксчиларга "вызов" ташлаганини айтди.

"Бу менинг дивизионим ва бу йигитларнинг баъзилари мендан қочишларининг сабаби бор. Улар барча камарлар учун жанг қилишимни ва бу фақат вақт масаласи эканлигини билишади. Биволга ўтган йили шартнома жўнатишди. Лекин, у мендан  қочди ва бошқаси билан жанг қилди. Мен Бетербиев ва кичик Смитга жангни таклиф қилдим. Аммо, уларнинг иккаласи ҳам мен билан рақобатлаша олмаслигини яхши тушунишади.

Биволда мен билан жанг қилиш учун шартнома имзолаш имконияти бор эди. Бироқ у бундай қилмади. Агар унинг Альварес билан реванш жанги ўтказилмаса, мен ундан камарни тортиб олиш учун навбатда тураман", - деган эди Рамирес.

Рамирес WВА рейтингида биринчи ўринни эгаллаб турибди, шу сабабли Бивол билан жанг бўлиши аниқ эди.

Рамирес кўп қиррали жангчи ва Бивол учун жуда ноқулай рақиб. У бошқа мексикалик боксчилардан фарқ қилади. Доимий равишда босим ўтказадиган ҳамюртларидан фарқли ўлароқ, Хильберто ўз вақтида тўхташни ва иккинчи рақам сифатида рақибига мослашишни билади. 

Унинг баландлиги - 189 см, қўлнинг кенглиги - 191 см. Айтганча, Биволнинг баландлиги ва қўл узунлиги 183 см. Лекин, бу мексикалик фақат узоқ масофада устун дегани эмас. Хильберто мослашувчан жангчи, у яқин масофадан ҳам жуда хавфли. Қолаверса кучли зарбага. 44 та ғалабадан 30 тасини нокаут эвазига қўлга киритилган. 

Бироқ, Рамирес икки баробар кўп жанг ўтказган бўлса-да, бундай қаршиликка ҳали дуч келгани йўқ. Канело билан жангда Дмитрий нафақат тактик маҳорат, ажойиб кардио ва хотиржамликни сақлай билиш қобилиятини ҳам кўрсатди. Рамирес билан жанг анча ҳаяжонли ва шу билан бирга техник жиҳатдан қийинроқ кечиши аниқ.

Мексикалик боксчи ярим оғир вазнда барча кутаётган Бивол - Бетербиев жангига тўсқинлик қилиши мумкин. Бу россиялик жангчининг карерасидаги энг қийин жанг бўлиши кутилмоқда. Агар Бивол Хильберто билан жангга худди Канелога қарши бўлганидек тайёргарлик кўрса, муваффақиятга эришиши мумкин.

Жанг олди мутахассислар фикри билан танишамиз.

Табиийки катта эҳтимол билан Бивол чемпион сифатида жанг фаворити ҳисобланади. Қолаверса у pound-for-pound рейтингининг собиқ етакчиси Канело устидан ғалаба қозонган. Аммо, Рамиреснинг натижасини ҳисобга олсак имкониятлар деярли тенг.

Бу икки экстра-классдаги жангчиларнинг кураши бўлгани учун жанг узоқ масофада ўтишига ишонамиз. Александр Усик ва Энтони Жошуа ўртасидаги иккинчи жангда бўлгани каби тактик кураш гувоҳи бўлишимиз аниқ. Кимнинг тактикаси устун келса, ўша ғалаба қозонади.

Камрон Ҳасанов тайёрлади