Abu Dhabi Chess Festival 2024. Бугун сўнгги тур, икки шахматчимиз пешқадам!

Мукофот жамғармаси 63 600 АҚШ долларини ташкил этувчи Abu Dhabi Chess Festival 2024 турнирининг "Masters" гуруҳида 11 нафар шахматчимиз ҳам ўз имкониятини синовдан ўтказяпти. Кеча ўтказилган 8-турдан сўнг мусобақа жадвалида ёш гроссмейстерларимиз Нодирбек Якуббоев (2665) ва Шамсиддин Воҳидов (2643) 6,5 очко билан қўшҳокимликни юзага келтиришди. 

Уларнинг ҳар иккиси ҳам ҳали турнирда мағлубиятга учрамаган. Нодирбек Якуббоев оқ доналарда бразилиялик Луис Паоло Супи (2571)ни мағлубиятга учратди. Воҳидов эса кетма-кет бешта ғалабадан кейин очко йўқотди. Шамсиддин оқ доналарда ҳиндистонлик Раунак Садҳвани (2653) билан дуранг ўйнади. 

Бу турда Жавоҳир Синдаров (2674) муҳим ғалабани қўлга киритди. У ҳиндистонлик Адҳибан (2532)ни таслим этиб, очколарини 6 тага етказиб олди. Синдаровда ҳам оз бўлса-да, чемпионлик учун имконият сақланиб қолди. Баҳром Бахриллаев (2344) оқ доналарда Жимми Жубин (Ҳиндистон, 2441)дан устун келди.  

Саккизинчи турда қолган шахматчиларимиздан Абдумалик Абдусалимов ва Ҳумоюн Бегмуратов рақибларига имкониятни бой беришди. Ортиқ Ниғматов, Муҳаммадзоҳид Суяров, Саидакбар Сайидалиев ва Афруза Ҳамдамова бу сафар ҳам дуранг натижа қайд этишди. 

Бугун ўтказиладиган сўнгги 9-турда Шамсиддин Воҳидов ўзи сингари 6,5 очко жамғарган Давид Паравян (FIDE, 2600)га қарши оқ доналарда ўйнайди. Қўшимча кўрсаткичларга кўра 1-ўринни эгаллаб турган Нодирбек Якуббоев қора доналарда Леон Мендонса (Ҳиндистон, 2621) билан ҳисоб-китоб қилади. Чемпионлик Нодирбекнинг ўз қўлида. Агар Якуббоев очко йўқотиб, аксинча Шамсиддин ғалаба қозонса, айнан у бош совринни қўлга киритади.