Abu Dhabi Chess Festival 2024. Нодирбек Якуббоев иштирокидаги марказий баҳсда дуранг, Синдаров пешқадамлар сафида!

Мукофот жамғармаси 63 600 АҚШ долларини ташкил этувчи Abu Dhabi Chess Festival 2024 турнирининг "Masters" гуруҳида 11 нафар шахматчимиз ҳам ўз имкониятини синовдан ўтказяпти. Ортда қолган 4-турда пешқадам Нодирбек Якуббоев (2655) FIDE байроғи остида ўйнаётган Володар Мурзин билан муросага келди. Мурзин ҳам Нодирбек сингари 3 очкога эга бўлиб турганди. 

Икки етакчининг очко йўқотишидан таъқибчилар унумли фойдаланиб қолишди. Жумладан, Жавоҳир Синдаров муҳим ғалабага эришиб, очколарини 3,5 тага етказди ва қўшимча кўрсаткичларга кўра 9-ўринга кўтарилиб олди. Ҳамюртимиз оқ доналарда ҳаракат қилиб, ҳиндистонлик Шрихаридан устун келди.     

Тўртинчи турда шахматчиларимиздан Шамсиддин Воҳидов, Абдумалик Абдусалимов, Ортиқ Ниғматов, Муҳаммадзоҳид Суяров, Саидакбар Сайидалиев ва Ҳумоюн Бегмуратов ғалабага эришишди. Баҳром Бахриллаев, Муҳиддин Мадаминов ва Афруза Ҳамдамова эса рақибларига имкониятни бой беришди. 

Бугун ўтказиладиган 5-тур олдидан Нодирбек Якуббоев 3,5 очко билан қўшимча кўрсаткичларга кўра 2-ўринни эгаллаб турибди. Володар Мурзин 3,5 очко билан пешқадамликни ўз қўлига олди. Жами 14 нафар шахматчи ҳисобида 3,5 тадан очко бор. Абдумалик Абдусалимов, Ортиқ Ниғматов ва Шамсиддин Воҳидов ўз очколарини 3 тага етказиб олишди.