Abu Dhabi Chess Festival 2024. Қаторасига бешинчи ғалабасини қўлга киритган Шамсиддин якка пешқадамга айланиб олди!

Мукофот жамғармаси 63 600 АҚШ долларини ташкил этувчи Abu Dhabi Chess Festival 2024 турнирининг "Masters" гуруҳида 11 нафар шахматчимиз ҳам ўз имкониятини синовдан ўтказяпти. Ортда қолган 7-турдан сўнг мусобақа жадвалида ёш гроссмейстеримиз Шамсиддин Воҳидов (2643) 6 очко билан якка пешқадам бўлиб олди. У 7-турда қора доналарда ўйнашига қарамай, ҳиндистонлик Пранав (2598)ни мағлубиятга учратди. 

Ҳали мағлубиятга учрамаган яна бир гроссмейстеримиз Нодирбек Якуббоев (2655) бу турда қора доналарда ҳаракат қилиб, FIDE байроғи остида ўйнаётган Давид Паравян (2600) билан дурангга имзо чекди. Жавоҳир Синдаров (2674) эса оқ доналарда Луке Леон Мендонса (Ҳиндистон, 2621) билан муросага кўчасини танлади. 

Еттинчи турда шахматчиларимиздан Абдумалик Абдусалимов, Ортиқ Ниғматов ва Баҳром Бахриллаев рақибларини мағлуб этишди. Муҳаммадзоҳид Суяров, Саидакбар Сайидалиев ва Афруза Ҳамдамова бу сафар ҳам дуранг натижа қайд этишди. 

Бугун ўтказиладиган 8-тур олдидан Шамсиддин Воҳидов 6 очко билан якка пешқадамга айланиб олган бўлса, Нодирбек Якуббоев 5,5 очко билан қўшимча кўрсаткичларга кўра иккинчи ўринни эгаллаб турибди. Жавоҳир Синдаров, Абдумалик Абдусалимов ва Ортиқ Ниғматов ҳисобида 5 тадан очко бор.