Албатта ўқинг! Нурмагомедов vs Макрегор. Кимнинг имконияти юқори? (сўров)

Бу борада бутунжаҳон оммавий ахборот воситаларида жуда кўплаб мақолалар, шов-шувли хабарлар чоп этилмоқда. Барчасида битта савол: ушбу жангда ким ғолиб бўлади, ҳозирги кунда ким кучлироқ? 

Дарҳаққиқат, бу жангнинг ғолибини аввалдан башорат қилиш жуда ҳам қийин ёхуд ким кучли эканлиги борасида фикр билдириш! Биз юртимиздаги кўзга кўринган спорт журналистлари, спортчи ва мураббийлар, санъат аҳли вакилларининг фикр ва мулоҳазаларини эътиборингизга ҳавола қилишни бошлаймиз. 

Абдуллоҳ Сагдиев – Ўзбекистон профессионал бокс Федерацияси раисининг биринчи ўринбосари, собиқ спортчи

- Бу жанг борасида жуда кўп гапирса арзийди. Сабаби, ҳар иккисининг ўзига хос жанг олиб бориш услуби бор. Қолаверса, мухлислар ёқимтойига ҳам айланиб улгуришган. Бир сўз билан айтганда, бир-бирига хос ва мос рақиблар. Конор чапақай, оёқ ва қўлда ишлаш техникаси юқори, бу унинг плюс томонлари бўлса, “партер”да ишлаш борасида эса мукаммал эмас. 

Хабибнинг устунлиги айнан “партер”да, бу эса доғистонлик жангчининг ижобий жиҳати ҳисобланади. Конорнинг яна бир устунлиги борки, Хабиб Нурмагоммедов каби жанг олиб борувчи рақиблар билан учрашишга улгурган. Мисол учун, Жозе Алдони айнан қўл зарбаси эвазига нокаутга учратган эди. Буларга яна Эдди Альваресни қўшиш мумкин. Лекин бу спорт, биз қандай фикр билдирмайлик, башорат қилмайлик, барчаси октагонда икки жангчи ўртасида ҳал бўлади. Шундай бўлсада,  жанг биринчи раунддан ўтса, Хабиб Нурмагомедов ғалаба қозонади, деб ўйлайман. 

Раҳматжон Рўзиохунов - бокс бўйича терма жамоа мураббийи

- Ҳар иккисининг имкониятини 50/50 баҳолаган бўлардим. Ўз вазнининг етакчилари. Қолаверса, жуда катта тажрибага эга ҳисобланадилар. Ғолиб борасида эса, ўша кунга ким яхши, мукаммал тайёргарлик билан етиб келса, ўша ғалаба қозонади. Бу ерда нафақат спортчилар балки, мураббийлар жанги ҳам кетади. Жисмоний ва руҳий тайёргарлик энг муҳим омиллардан саналади. Тактик услублар ҳам роль ўйнайди. 

Ёдингизда бўлса, Флойд Мейвезер билан ўтказган бокс борасидаги жангида америкалик боксчининг мураббийлари оқилона тактика қўллаб, Флойднинг ортиқча қийинчиликсиз ғалабасини таъминлашган эди. Яъни, уни дастлабки раундларданоқ ютишга ҳаракат қилмади. Шунчаки, унинг қай даражада жанг олиб боришини, ўзининг эркин ҳаракатлари билан кузатди ва мавриди келди, бир-икки зарбаси билан масалани ҳал қилган эди. Юқорида айтиб ўтганимдек, бу жангга қайси спортчи ва унинг жамоаси етук ҳолатда етиб келса, ғалаба ўшаники бўлади.

Аҳмаджон ЭШМАТОВ ёзиб олди, ўз мухбиримиз