Али Абдел-Азиз: "Анкалаевдан жангга чиқмасликни илтимос қилгандим"

Абдел-Азиз Алекс Перейрага қарши чемпионлик реванш жангидан олдин унинг мижозида қандай муаммолар юзага келгани ҳақида гапирди.

"Анкалаев бу жанг олдидан деярли қирқ кун машғулот ўтказмади. У Доғистондан қовурғалари шикастланган ҳолда келган ва атиги учта спарринг ўтказганди. Ҳар сафар спаррингни тўхтатишимиз керак эди ва UFC буни биларди. Унга укол қилишди, кортизон юборишди.

Шу қирқ кун ичида у фақат югурди, арғамчида сакради, оёқларида ишлади ва жисмоний машқлар билан шуғулланди. У спарринглар ўтказмади, курашмади ва мен UFC жангни кечиктиришига умид қилгандим. Мен ундан жангга чиқмасликни илтимос қилдим, лекин у менга қулоқ солмади", - деди Абдел-Азиз Submission радиосига берган интервьюсида.